Комисијата за натпреварување при Фудбалска федерација на Македонија (ФФМ) на седницата одржана на 4 мај 2026 година донесе одлука за покренување дисциплински мерки по инцидентите што го одбележаа 30. коло од Првата македонска фудбалска лига во сезоната 2025/26.
На дуелот во Кавадарци меѓу ФК Тиквеш 1930 и ФК Аресими 1973, одигран на 3 мај, сериозни прекршувања биле регистрирани од страна на домашната публика. Навивачката група „Лозари“ употребила пиротехнички средства, при што дури 38 пати биле фрлани на теренот. И покрај двете официјални предупредувања преку разгласот, инцидентите не престанале. Ситуацијата дополнително ескалирала со истакнување провокативен банер со навредлива содржина кон ФФМ, кој подоцна бил отстранет. Поради овие случувања, против клубот е покрената дисциплинска постапка.
Инциденти беа забележани и по натпреварот во Кратово, каде што се сретнаа ФК Силекс и ФК Шкендија. По завршувањето на средбата, фудбалерот на Шкендија, Имран Фетаи, оштетил врата од службените простории, удирајќи ја со нога, за што е составен и полициски записник.
Дополнително, шефот на стручниот штаб на Шкендија, Јетон Беќири, се однесувал недолично кон припадници на МВР, упатувајќи вербални навреди во службените простории.
Комисијата за натпреварување на ФФМ покрена дисциплинска постапка против двајцата претставници на Шкендија, а случаите се предадени на Дисциплинската комисија на ФФМ за понатамошна постапка.
Воедно, клубот ФК Шкендија е задолжен во рок од 15 дена да постигне договор со ФК Силекс за надомест на причинетата материјална штета и писмено да ја извести Комисијата за натпреварување за исполнување на обврската.