Се работи на целосна реконструкција на подземната инфраструктура на улицата Анте Банина во Штип. Овде се заменува главната водоводна линија, проект вреден 2,7 милиони денари, што го реализира Јавното претпријатие Исар. Паралелно со тоа, се работи и на атмосферската канализација, која со години наназад претставувала сериозен проблем за жителите. Градоначалникот Иван Јорданов истакна по завршувањето на подземната инфраструктура, оваа улицата ќе биде изасфалтирана, а ќе се работи и на уредување на влезовите пред станбените згради.
,,Активности се одвиваат на ул. Анте Банина. Се заменува главна водоводна линија во вредност од 2,7 милиони денари преку ЈП ИСАР. Паралелно се работи на подземна инфраструктура на решавање на атмосферската канализација на истата оваа улица, која што во минатото создавала проблеми заради неканализирањето и не соодветно третирање. Дополнително по завршувањето на подземната инфраструктура, оваа улица ќе биде изасфалтирана. Станува збор за главната сообраќајница која што ги поврзува нас. Сењак и нас. Баби. Ќе се работи и на површините пред станбените згради, ќе се уредуваат влезовите со павер елементи.“, рече Јорданов
Директорот на ЈП ИСАР Александар Арсовски, изјави дека со реализацијата на овој проект, граѓаните конечно ќе добијат соодветни услови за снабдување со вода и решавање на долгогодишните инфраструктурни проблеми
По завршувањето на реконструкцијата, граѓаните ќе добијат не само нова инфраструктура, туку и поквалитетни услови за живеење и безбедно движење. Од Општина Штип најавуваат дека ваквите зафати ќе продолжат и во други делови од градот.
Иван Митев, М-Нет