Над 60 учесници од 15 држави денеска се дел од 47. издание на Меѓународниот турнир „Македонски бисер“ кое се одржува во Штип. Натпреварот привлече и голем број публика во спортската сала „Јордан Мијалков“, која ги бодреше своите фаворите. Според претседателот на Боречката федерација, изданието е со најголем квалитет досега.
„Денеска се одржува 47. турнир „Македонски бисер“, кој е традиционален турнир кој го организира Боречката федерација на Македонија во склоп со БК Балканец како технички организатор. Денеска се дојдени спортисти од 13 – 14 држави, ова е сениорски турнир и денеска се почнаа многу квалитетни борби, ќе продолжи во текот на целиот ден и ќе си ги покажат своите сили тука“, вели Дејан Богданов, претседател на Боречката федерација на Македонија.
Дека пред нив е голем предизвик и тешки борби, согласни се и натпреварувачите. Актуелниот Државен првак на Македонија во борење, Дејан Митров, пред камерите на М-Нет Телевизија истакна дека очекува да ги совлада противниците и да постигне високи резултати.
„Ви благодарам и вам медиумите кои ни помагате да го формираме нашиот спорт. 47. издание на „Македонски бисер“ е навистина квалитетно издание, има голем број медалисти кои се качиле на пиедесталот на светски и на европски првенства. Ќе имаме тешка задача. Во првото коло успеав да го совладам претставникот од Израел со 5:2, во четвртфинале ќе се сретнам со претставникот од Бугарија, кој е актуелен бронзен медалист на европски првенства, со добра борба, тактика и поддршка од публиката верувам дека ќе успеам да победам и да ја израдувам штипската публика, која е гладна за спортски резултати и високи достигнувања“, вели Митров.
Освен од Македонија, на 47. издание на Турнирот учествуваат и натпреварувачи од Грција, Романија, Албанија, Косово, Шпанија, Израел и други држави. Финалните борби и свеченото отворање е во 17:00 часот.
Ребека Спасова М-Нет