Речиси до темел изгоре магацин за детски изграчки во близина на приградската населба Три Чешми во Штип. Според првични информации од запалено ѓубре во близина на објектот, и брзината на ветерот огнот се проширил и кон објектот, по што за кратко време го зафатил и целиот објект. Останатите објекти со ладење се заштитуваат да не бидат зафатени од пламените јазли, а на теренн се противпожарните единици од Штип, Свети Николе и Кочани. Според командирот на ТППЕ Штип, Дарко Коцев, се прават големи напори за пожарот да биде ликвидиран и да не ги зафати околните објекти. Дојавата пристигнала во 12:35 часот и веднаш се излегло на терен.
„Првично добивме дојава за запалено ѓубре, но кога се наближивме видовме дека не е ѓубре туку огромен магацин. На лице место се излезени четири противпожарни возила со 15 пожарникари, а помош пристигна од Свети Николе и Кочани. Се надевам дека за брзо време пожарот ќе биде локализиран.“ – кажа Коцев.
Според очевидци кои беа на местото на настанот пожарот се случил многу брзо, виделе мал пламен, а потоа забележале дека гори цел објект.
Во пожарот нема жртви, причинета е само огромна материјална штета и истата дополнително ќе се утврдува.
Лаура Стојанова М-Нет