По повод празникот Курбан Бајрам до верниците од исламската вероисповед честитка упати градоначалникот на Општина Штип, Благој Бочварски, во која им посакува празнични мигови, исполнети со многу љубов и семеен мир.
Верскиот празник градоначалникот Бочварски го честита со желби за многу успеси, а исто така во моментите на пандемија, им посакува и многу здравје. Тој порачува да се почитуваат мерките и препораките, за да се заштитат себе си и сите наоколу.
– Ќе дојдат подобри времиња, кога овие празнични мигови ќе може да ги минуваме собрани со семејствата и во верските објекти, а до тогаш да покажеме општествена одговорност, за доброто на сите нас. Во моменти кога нашиот град и нашата држава минуваат низ тешки мигови и искушенија, меѓусебното почитување и почитување на различностите е знак дека цврсто чекориме по патот на едно општество за сите – стои во честитката од Бочварски.