Ракометарите на РК Вардар ги финализираат подготовките пред првиот меѓународен предизвик оваа зима, со настапот на силниот турнир „Labin Handball Cup“, кој од петок (30 јануари 2026) ќе се одржува во хрватскиот град Лабин, а ќе заврши во сабота со одигрување на финалниот натпревар.
Црвено-црните ќе имаат можност да ги одмерат силите со квалитетни противници, бидејќи покрај Вардар, на турнирот ќе настапат и РК Загреб и РК Сесвете од Хрватска, како и словенечкиот претставник РК Слован Љубљана.
Токму Слован Љубљана ќе биде првиот противник на Вардар. Натпреварот е закажан за 30 јануари, со почеток од 18:00 часот, а ќе се одигра во спортскиот центар „Франко Милета“ во Лабин.
Овој турнир претставува важна проверка за формата и уигрувањето на екипата, како и можност стручниот штаб да добие јасна слика за моменталната подготвеност на тимот пред претстојните натпреварувачки обврски.
Навивачите со голем интерес ќе ги следат настапите на Вардар на меѓународната сцена, со надеж за добри изданија и позитивен резултат на турнирот.