По двенеделниот пост верниците денеска го слават еден од најголемите христијански празници Успение на Пресвета Богородица. Кочанскиот храм уште од утринава беше полн со верници кои запалија свеќа за здравје, и со погача и пораки за среќа и мир го дочекаа денешниот ден. На средина на храмот беше поставена и плаштеницата каде верниците се поклонија на Пресвета Богородицa.
„Светата црква денеска го чествува еден од најголемите празници, а тоа е Успение на Пресвета Богородица. На овој празник чувствтата на секој христијанин се измешани, се чувствуа таговна радост. Иако го оставила светот таа сепак сеуште е тука и им помага. Црквата е веќе преполна со верници кои се поклонуваат на плаштеницата“ – вели Арсовски.
Православната Црква на 28 август го празнува земниот крај на Пресвета Богородица и Нејзината смрт ја нарекува „Успение“ – раскошен термин кој во себе ги соединува сонот, блаженството, мирот, спокојството и радоста. Самиот лик на Богомајката објавува бескрајно спасение, сострадалност, грижа и доверба, сила и смирение, чистота и убавина, љубов и победа на љубовта. Светлина со која сјае Нејзиниот лик го осветлува и овој празник, на кој човекот веднаш сфаќа дека смртта е всушност чин на животот. Црквата никогаш во смртта на Богомајката не почувствувала страв, ниту ужас, ниту жалост и надгробно ридање, туку секогаш една блескава воскресна радост. Сите обичаи во врска со празниците посветени на Мајката Божја се засноваат на почитување на нејзиниот култ, во кој се вклопени верувања и ритуали од народната религија. Сите обичаи за овој ден се поврзани со водата и босилекот, за кој се верува дека е божјо растение. Затоа, според народното верување, денес во садот треба да ставите малку босилек и да го послужите на семејството. Се верува дека на тој начин Света Богородица штити од злото.
Лаура Стојанова М-Нет