Македонскиот кардиолог и врвен алпинист д-р Сашко Кедев од Штип испиша нова страница во спортската историја на Македонија. Утринава, Кедев го искачи врвот Г1 (Gasherbrum I) во Пакистан, со што стана првиот Македонец и еден од малкумината во регионот кој ги има освоено сите 14 највисоки планински врвови на светот над 8.000 метри.
Со оваа експедиција, Кедев ја заокружи колекцијата на светските „осумилјадарки“, меѓу кои е и најопасниот Анапурна (8.091 м), најнискиот Шишанпагма (8.027 м) и највисокиот Монт Еверест (8.848 м).
Покрај тоа, Кедев е единствениот Македонец кој успеа да ги освои и седумте највисоки врвови на сите континенти (Seven Summits) — подвиг кој го вбројува меѓу светската елита на алпинизмот.
Овој неверојатен успех не е само личен триумф, туку гордост за целата нација, потврда за тоа дека и македонскиот дух може да стигне до највисоките светски врвови.
