Дизелот поевтинува за 7 денари, бензините до 4 денари, нови цени на горивата од полноќ. Како што соопштуваат од регулаторната комисија за енергетика цената на бензинот ЕУРОСУПЕР БС-95 се намалува за 3,5 денари по литар и ќе изнесува 84 денари за литар.
Бензинот ЕУРОСУПЕР БС-98 поевтинува за 4 денари и ќе се продава по цена од 86 денари за литар. Најголемо намалување има кај дизелот и екстра лесното масло за домаќинство, чии цени се намалуваат за 7 денари по литар. ЕУРОДИЗЕЛ БС (Д-Е V) ќе чини 80,5 денари за литар, додека цената на Екстра лесното масло за домаќинство ќе изнесува 79,5 денари за литар.
Намалување има и кај мазутот М-1 НС, чија цена се намалува за 3,932 денари за килограм и ќе изнесува 42,291 денари.
Од РКЕ информираат дека намалувањето на цените е резултат на пониските референтни цени на светскиот пазар, каде што бензините бележат пад од 8,216 проценти, дизелот од 12,699 проценти, екстра лесното масло од 12,354 проценти, а мазутот од 11,352 проценти.
Од Комисијата потсетуваат дека утврдените цени се максимални, а трговците со нафтени деривати имаат можност да ги формираат и пониско од определените највисоки цени.
Иван Митев, М-Нет