Седмото коло во Втората македонска фудбалска лига донесе возбудливи натпревари, ефикасни дуели и неколку важни бодови во борбата за подобар пласман. Дербито во Охрид заврши без победник, Работнички беше сигурен на домашен терен, додека реми исходи имаше и во Кочани и Радовиш.
Охрид и Брера Струмица одиграа 2:2 во натпревар со различни периоди на игра. Гостите стекнаа предност од два гола во првото полувреме, но охриѓани не се предадоа и со два погодоци по паузата успеаја да избегнат пораз и да освојат бод.
Работнички, пак, забележа убедлива победа од 5:1 против Камјани, наметнувајќи се со ефикасна игра и потврдувајќи ја разликата на теренот. Домаќините ја контролираа средбата, а гостите до почесен погодок стигнаа во завршницата.
Во Кочани, Осогово и Еуромилк ГЛ ремизираа 1:1, меч кој го гледавте на М Нет телевизија. Домаќините беа блиску до трите бода, но гостинскиот состав во судиското продолжение успеа да се избори за израмнување. Поделбата на бодовите не е идеално сценарио за ниту една од екипите во нивната потрага по подобри резултати.
Македонија ЃП минимално го совлада Шкупи со 1:0 и си замина со целиот плен од дуелот против последнопласираниот тим на табелата. „Лавовите“ ја искористија својата шанса во второто полувреме за да стигнат до значајна победа.
Тетекс се радуваше на убедлив триумф на гостувањето кај Новаци. Тетовци славеа со 4:1, наметнувајќи се со поефикасна игра и оставајќи го домашниот состав без позитивен резултат.
Без победник заврши и средбата во Радовиш, каде Детонит Плачковица и Кожуф одиграа 1:1. Двата тима постигнаа по еден гол, па бодовите беа поделени.
Седмото коло ќе биде заокружено утре во Струмица, каде Беласица и Пелистер ќе ги одмерат силите во дербито кое е закажано за 18:00 часот, под рефлектори, ќе ги следите во живо на М Нет.
Александар Ванев, М-Нет