Новопромовираниот прволигаш Шкендија Арачиново продолжува амбициозно да го засилува својот играчки кадар пред новата сезона, откако официјално ги ангажираше искусните фудбалери Марко Симоновски и Бесир Демири.
Напаѓачот Марко Симоновски пристигнува во Арачиново од кипарскиот Еносис, носејќи богато интернационално искуство и докажан голгетерски квалитет. Во клубот веруваат дека неговата ефикасност и лидерски способности ќе претставуваат значајно оружје во офанзивната линија на тимот.
Покрај него, нов член на „црвено-црните“ е и Бесир Демири, досегашниот капитен на Работнички. Искусниот дефанзивец се разделува со скопскиот клуб по неговото испаѓање во Втората лига и ќе биде едно од најзвучните засилувања за Шкендија во пресрет на прволигашката кампања.
Со доведувањето на двајцата добро познати фудбалери од македонската сцена, Шкендија Арачиново испраќа јасна порака дека нема намера да биде само учесник во елитното друштво, туку клуб кој ќе се бори за стабилна позиција и високи резултати во својата дебитантска сезона меѓу најдобрите.