Започна реконструкцијата на првата од трите ветени улици во село Долни Балван. Градежните активности на терен започнаа денеска, а увид во стартот изврши градоначалникот Виктор Паунов. Општината за оваа улица издвои нешто над 700 илјади денари пари од Буџето. Паунов потенцираше дека во наредните денови ќе се пристапи и кон реконструкција на улиците во село Радање, а ново спортско игралиште ќе добија жителите на Долни Балван.
„Се работи за улица која е со површина од 700 метри квадратни и должина околу 200 метри, инвестиција која Општина Карбинци ќе ја чини 700 илјади денари. Со овој проект ќе се задоволат потребите на граѓаните, а ќе продолжиме да инвестираме во инфраструктурата и да ги подобриме условите за живот во повеќе населени места. Овој пат е во склоп на она што се најавуваше претходно дека ќе почнеме со изградба на три нови улици, ова е првата од нив“ – вели Паунов.
Во оваа прилика Паунов истакна дека започнуваат со реализација и капиталните проекти на теритроија на Општина Карбинци. За два месеца се очекува реконструкција на патниот правец Долни Балван – Тариници, како и завршување на училиштната зграда во Таринци.
„Очекувам за месец до два доколку се завршат сите постапки од страна на Министерството за транспорт и врски да започне реконструкцијата на патниот правец Таринци – Долни Балван. Тендерската постапка е веќе завршена и се надевам дека ќе се направи избор за изведувач.“ – додава Паунов.
Паунов истакна дека се работи и на пристапниот пат кон филтер станицата со што потенцираше дека работа има доста и ветени проекти кои во наредниот период ќе се реализираат.
Лаура Стојанова М-Нет