Одбојкарките на ОК Младост УГД продолжуваат со одличните настапи во пролетниот дел од шампионатот, откако пред својата публика во Штип забележаа уште една тешко изборена победа. Во рамки на 11. коло од Прва женска одбојкарска лига, Младост УГД по вистинска драма и повеќе од два часа игра со 3:2 (26:24, 18:25, 25:19, 11:25, 15:13) го совлада составот на Газели Волеј.
Натпреварот беше исполнет со бројни пресврти и неизвесност во секој сет. Двата тима наизменично ја преземаа иницијативата, а одлуката за победникот падна дури во тај-брејкот, каде што домашните одбојкарки покажаа повеќе смиреност и концентрација во клучните моменти.
Во решавачкиот сет се водеше вистинска „игра на нерви“, а неколку поени во финишот се покажаа како пресудни за радост на штипската публика. За екипата на Газели ова е втор пораз по ред, но гостинките си заминуваат од Штип со освоен бод, што може да се покаже како значаен во продолжението на сезоната.
Останатите натпревари од 11. коло во најсилната женска одбојкарска конкуренција се на програмата денеска, а Младост УГД со оваа победа дополнително ја зацврсти својата позиција и ја потврди добрата форма на стартот од пролетниот дел.