Навивачката група Сити Парк Бојс преку јавно соопштение изрази сериозно незадоволство од состојбата во КК Работнички, посочувајќи дека клубот со години се соочува со финансиски проблеми и организациски хаос.
Во објавата се наведува дека, според навивачите, Работнички од сезона во сезона тоне во долгови и се бори за опстанок, а главната одговорност ја лоцираат во управата и стручниот штаб. Тие бараат итна оставка на раководството, како и целосен и транспарентен отчет за сите влезени и излезени финансиски средства во клубот.
„За нас Работнички е светост, а за некого очигледно само бизнис проект“, стои во пораката, која јасно укажува на длабоката разочараност кај најверните поддржувачи на клубот.
Како следен чекор, навивачите најавија бојкот на сите натпревари на Работнички, вклучително и оние што се играат на домашен терен, сè додека, како што велат, не дојде до суштинска промена во управувањето со клубот.
Од „Сити Парк Бојс“ порачуваат дека борбата започнува од овој момент, потенцирајќи ја нивната безусловна поддршка кон клубот, но и решителноста да се спротивстават на, како што наведуваат, долгогодишните неправилности.
Во моментов се очекува реакција од управата на КК Работнички, додека јавноста внимателно ќе го следи развојот на настаните околу еден од најтрофејните македонски кошаркарски клубови.