Еден од најдобрите фудбалери на Шкендија Арачиново и капитен на тимот, Амир Нухија, е на чекор до трансфер во Струга Трим Лум, пренесуваат извори блиски до клубот.
По историскиот успех и обезбедениот пласман на Шкендија Арачиново во Првата македонска фудбалска лига, Нухија е подготвен за нов предизвик во својата кариера. Иако за неговите услуги постоел интерес и од клубови од Косово и Турција, офанзивецот наводно донел одлука да остане во домашното првенство и да го облече дресот на Струга Трим Лум.
Во Струга веќе се работи на создавање на конкурентен тим за новата сезона. Клубот планира значително подмладување на составот и сериозни кадровски промени, а ангажманот на Нухија се вклопува во амбициозниот проект чија главна цел е враќање на европската сцена.
Со своите настапи во изминатите сезони, Нухија се наметна како еден од најперспективните македонски фудбалери, а неговото евентуално доаѓање во Струга би претставувало значајно засилување за тимот пред стартот на новата прволигашка сезона.
Официјална потврда за трансферот се очекува во наредните денови.