Расте интересот за вакцинација против сезонски грип во Штип. Првичните две илјади дози бесплатни вакцини се потрошени, а пристигнаа уште нови 1000 дози. Согласно интересот од страна на граѓаните, се носат и нови дози вакцини оод страна на Министерството за здравство. Во тек се уште е и пријавувањето на вакцинација.мк со цел ризичните категории граѓани навремено да се заштитат од грип.
„Од 3000 дози на вакцини кои пристигнаа во центарот за јавно здравје потрошени се околу 2400 дози.“ – вели Живкова.
Од петок треба да започне и комерцијалната вакцинација против сезонски грип. Набавени се 100 комерцијални вакцини за граѓаните кои не се во ризичните групи и истите ќе се наплаќаат по 700 денари.
„Очекуваме комерцијалните вакцини да пристигнат во петок и од тогаш да започне вакцината.“ додава Живкова.
Министерството за здравство информира дека за вакцинација против сезонски грип за ризични категории население досега се пријавени над 76 илјади граѓани, а вакцинирани се повеќе од 43 илјади лица низ државата.
„Превентивни тимови продолжуваат и со теренска вакцинација во домашни услови за повозрасни и неподвижни лица, како и за лица со попреченост“- велат од здравство.
Исто така, е започната и вакцинацијата со комерцијалните вакцини во ЦЈЗ Скопје, а во текот на неделата ќе отпочне вакцинација и во другите центри за јавно здравје низ државата.
Во ризични категории граѓани спаѓаат возрасните пациенти над 65 годишна возраст, пациентите со хронични болести, бремени жени, деца од 6 месеци до пет години, здравствени работници, лица сместени во установи за социјална заштита на стари лица и вработени во овие установи.
Лаура Стојанова Ќирчов, М-Нет