Со 11 милиони денари преку Министерството за локална самоуправа, Општина Карбинци по 50 години ќе го реконструира училиштето во село Таринци. Проектот вклучува целосно подобрување на училишните услови, а ќе биде и можност да се промени стариот начин на затоплување и да се овозможи парно-греење. Реализацијата ќе започне со завршувањето на оваа учебна година, а градоначалникот, Виктор Паунов, најавува нејзино завршување до почетокот на следната учебна година.
„Проектот ќе значи реконструкција на едната училишна зграда со рушење и градење на нова училишна зграда со доградба на овие две стари истрошени објекти. Ова ќе го направи објектот енергетско-ефикасен со санитарни јазли во самиот објект, а ќе има и проширување, односно ќе биде изградена една нова училница, нова просторија, изградба на котлара во самиот објект за централно парно греење на целото училиште“, истакна Виктор Паунов, Градоначалник на Општина Карбинци.
Проектот е од особено значење за општина Карбинци и учениците во с. Таринци кои со реконструкцијата ќе добијат подобри услови за учење. Ваквото значење го истакнаа и градоначалникот Паунов и директорката на општинското училиште „Страшо Пинџур“, Наталија Костова.
„Ова е многу важен момент за ова населено место од причина што повеќе од 50 години е старо ова училиште и за првпат ќе се реконструира, доградува и проширува со своите капацитети. Село Таринци ќе добие ново училиште коешто ќе може да понуди, навистина, поинакви услови како што заслужуваат учениците и наставниот кадар“
„Ќе се реши нашиот децениски горлив проблем, ќе се овозможат услови за учење кои се карактеристични за 21. век“, истакна директорката Костова.
Договорот кој е потпишан со Министерството за локална самоуправа предвидува финансиски средства од 11 милиони денари, но целокупната финансиска рамка и колкаво ќе биде кофинансирањето од страна на Општината ќе се знае со објавувањето на јавната набавка.
Ребека Спасова М-Нет