Брегалница утре патува во Скопје каде ќе гостува кај екипата на Работнички во рамки на 20. коло од Првата македонска фудбалска лига. Овој меч ќе се одигра на стадионот „Борис Трајковски“ во Маџари со почеток од 14:00 часот.
„Сините“ веруваат во позитивно издание и далеку поефикасна игра во однос на првиот пролетен дуел со Скопје.
Офанзивецот Ѓорѓи Ѓорѓиев пред утрешниот натпревар потенцира дека екипата е подготвена за предизвикот против силна екипа како Работнички која игра одлично во новата година, и низ пријателските натпревари, но сето тоа го покажа и на првиот првенствен натпревар пролетва со триумфот од 0:2 на гостувањето против Победа.
„Носиме целосен респект за екипата на Работнички, но знам и дека носиме голем мотив за надигрување со еден квалитетен противник. Сигурен сум ќе дадеме се од себе да дојдеме до позитивен резултат“ – вели Ѓорѓиев и дополнува:
„Атмосферата во тимот е навистина на едно високо ниво, самодовербата кај секој поединец мора исто така да биде на повисоко ниво и верувам дека ќе прикажеме подобра игра од претходното коло. Но и поефикасна игра, затоа што создаваме шанси но изостанува реализацијата. Сите во тимот знаеме дека навивачите очекуваат од нас позитивни резултати, па мора да го дадеме максимумот за да не ги разочараме“.