Нема крај на штипските спортски, или поточно на фудбалските возбудувања. Последното ни доаѓа од медитеранската Малта од фудбалскиот тренер Антонио Доневски или популарно наречен во Штип – Анте.
До неодамна, Анте беше Координатор на Пионерско – Младинската школа а Директор на Брегалница беше Елмир Мандак. Анте заедно со Мандак ги минаа сите школи во Брегалница под водство на нивниот тренер Драги Ефтимов а покрај нив беа Ивица Крставски, Никола Тонев, Душко Андонов и уште многу други.
Анте се оддаде на учењето и во Софија ја заврши Фудбалската Академија и продолжи в тренерските води. Желбата за осознавање и докажување успешно го заврши со стекнување на УЕФА „ Б “ и „ А “ лиценца и сега е тренер на младинската екипа на ФК Сиренс од Малта. Прволигашот Сиренс штотуку започна со првенството, веќе се одиграно 6 кола и рано е да се прогнозира, иако амбициите се да го одржат прволигашкиот статус, иако мора да споменеме дека годинава играа во првото коло на Лига на Европа.
Засега Анте е задоволен од приемот и односот кон него на Малта и спортската редакција на Мнет ТВ му посакува успешна тренерска кариера, па еден ден да го видиме и на „кормилото“ на некоја сениорска екипа.
Драги Герасимов – Пушка Mnet.mk