По долг претрес, низа прашања и одговори, како и три поднесени амандмани од советничката група на СДСМ и коалицијата кои не беа усвоени, Штипскиот совет го донесе Буџетот за 2023 година. Вкупниот буџет е зголемен за 4,2% и изнесува 1.175.322.000 денари. Основниот буџет е зголемен за 11% и изнесува 459.890 денари. Најмногу приходи, секако, се предвидени од даноците и тоа 53%.
„Даночните приходи влегуваат со 53% во вкупниот Буџет и истите изнесуваат 243.520 денари. Неданочните приходи влегуваат 1,5% и истите изнесуваат 6.459.000 денари, трансферите и донациите учествуваат со 35% и истите изнесуваат 136.951.000 денари и капиталните приходи се 45.960.000 денари или учествуваат со 10%“, вели Ивана Трендафилова од Одделението за финанасии при Општина Штип.
Најмногу од средствата Општината ќе потроши за капитални инвестиции, односно 37%. За плати, наемнини и надоместоци планирано е да се потрошат 20% од вкупнио буџет.
„За плати, наемнини и надоместоци е планирано да се потрошат 20% од вкупниот буџет или сума од 89.500.000 денари. За резерви и недефинирани расходи е предвиден трошок од 500.000 денари или 0,3%, категоријата стоки и услуги влегува со 23% во основниот буџет или 106.320.000 денари, каматните плаќања се со износ од 300.000 денари, за субвенции и трансфери ќе се одвојат 16% од вкупниот буџет или износ од 74.050.000 денари, социјални бенефиции од 0,1% или 700.000 денари и капитални расходи со 37% или 186.520.000 денари“, додава Трендафилова.
Советот Буџетот го донесе со мнозинство гласови, 15 гласа ЗА и 9 воздржано.
Ребека Спасова М-Нет