Стапи на сила Законот за стечајци кој минатата недела беше едногласно усвоен во Собранието. Дел од одредбите со кои се уредуваше ова прашање веќе немаат правна сила, па поради тоа се појави потреба од донесување на нов закон кој е во пресрет на долгогодишните барања на оваа категорија граѓани и негово стапување на сила.
„Законот за материјално обезбедување на невработените лица поради приватизацијата на претпријатијата со доминантна сопственост на државата, популарно наречен Закон за стечајци стапи на сила. Стечајците коишто ги исполнуваат условите треба во рок од 30 дена да се пријават во подрачните единици на Агенцијата за вработување.“ – соопштија од Министерството за труд и социјална политика.
Законот обезбедува околу 1100 стечајци да добиваат паричен надоместок од 9.242 денари до денот на пензионирањето или 34% од просечно исплатената месечна нето плата по работник во државата за претходната година.
Со овој закон материјално ќе се обезбедат лицата кои имале најмалку 14 години работен однос во претпријатијата со доминантна сопственост на државата, кои на денот на поднесување на барањето се на возраст од најмалку 52 години (жена) и 55 години (маж), на кои работниот однос им престанал заклучно со 31 декември 2020 и кои оствариле право на паричен надоместок по 1 јануари 1993 година, а кои од 31 декември 2020 година до денот на влегување во сила на овој закон, не биле во работен однос.
Со новиот закон се овозможува материјално обезбедување на лица на кои им престанал работниот однос по основ на стечај, ликвидација или технолошки вишок, во претпријатија со доминантна сопственост на државата или по нивна приватизација, доколку не го промениле единствениот матичен број на субјектот. Во случај на промена истите да произлегуваат од претпријатието со доминантна сопственост на државата, во периодот од 1 јануари 1993 до 31 декември 2020 година.
Како што велат од МТСП, со последните измени на Законот за стечајци, од 2017 година до денес решен е статусот на околу 13 000 стечајци.
Лаура Стојанова МНет