Чичко Мемед од село Парналија, штипско, деновиве на штипскиот пазар продава домашните домати по цена од само 20 денари за килограм. Вели дека цената некогаш била значително повисока и дека доматите ги продавал по 50, па и 60 денари за килограм. Но, како што раскажува, купувачите реагирале дека цената е превисока, па продажбата била слаба. Затоа морал и тој да ја намали цената, за да може полесно да ги продаде домашните производи.
Чичко Мемед раскажува дека земјоделството е една од најтешките, но и најнепредвидливи работи. По целогодишниот труд, земјоделците често зависат од временските услови и од тоа каква ќе биде годината. Тој додава дека земјоделецот може да вложи многу труд, време и средства, но на крајот природата е таа што има последен збор.
Чичко Мемед продава и домашни краставици, кои на пазарот ги нуди по 25 денари. Но, како што вели, купувачите и за нив се ценкаат, па сакаат да ги земат по 20 денари. Тој додава дека во кафана за половина краставица, дел од домат и мала грутка сирење луѓето без проблем би дале и над 150 денари.
На крајот, и покрај тешкиот и неизвесен земјоделски живот, чичко Мемед продолжува да произведува и да ги носи домашните производи на штипскиот пазар. За него, најважно е производот да стигне до купувачот, иако, како што покажува неговата приказна, трудот на земјоделецот не секогаш се вреднува доволно.
Ева Тушевска, М-Нет