ДМУЦ „Сергеј Михајлов“ Штип утре ќе го прослави својот патронен празник. За првпат годинава ќе се формира оркестар составен од ученици и наставници кои ќе изведат стари македонски евергрини, со што ќе се замени класичната музика и досегашниот начин на организирање на патрониот празник со нешто ново. Манифестацијата ќе се одржи утре во дворот на музичкото училиште. Директорот Кавраков ги повика граѓаните да бидат дел од настанот и да уживаат.
„За првпат оваа година успеавме да ја реализираме идејата која трае веќе пет – шест години, да се формира еден оркестар односно Биг бенд составен од ученици и наставници. На самиот концерт ќе бидат изведени популарни македонски евергрини, распишани аранжмани од скопски композитори. Особена чест ни е да биде нешто различно освен класичната музика која ја изучуваме во ова училиште еве надвор од програмата да настапиме овој тип на концерт. Ќе биде во училишниот двор“ – вели Кавраков.
На одбележувањето на патрониот празникна Сергеј Михајлов ќе настапат ученици и наставници но и деца кои завршиле и ќе пеат песни од изведувачи по своја желба. Со ова вели Кавраков се покажува задоволството на учениците од самото училиште.
„Оркестарот е составен од 15 ученика и 7 до 8 наставника. Има ученици кои завршиле минатата година ама на своја желба да отпеат некоја песна од нашите изведувачи“ – додава Кавраков.
Со овој настан кој е новитет ДМУЦ „Сергеј Михајлов“ Штип додава уште еден во низата настани за паметење. Како што истакна Кавраков, изминатата година се реализирани Новогодишниот и Велигденскиот концерт, голем број натпревари во државата и странство, многу освоени награди, како и богата програма во текот на целата училишна година.
Лаура Стојанова М-Нет