Утре во 6:25 часот со линијата на релација од Трговски центар до Стар Караорман започнува градскиот линиски превоз во Штип. Утре и во наредните два дена граѓаните ќе имаат можност да се возат бесплатно. Во истовреме ќе се подели информативен материјал со што граѓаните ќе бидат запознати со возниот ред и релациите.
„Ќе започнеме со делење на информативен материјал на кој ќе бидат достапни сите потребни материјали за граѓаните. Во тек е реновирање, адаптирање и брендирање на автобуските постројки и ќе има објавени мапи за линиите и возните редови. Преку GPS ќе се следи движењето на автобусите и граѓаните ќе имаат увид за колку време возилото ќе биде на одредена постројка“, вели Стефановски.
Дневните автобуски билети ќе се купуваат во самите автобуси, а месечните и годишните на наплатниот пункт на ЈП „Стипион“. Според директорот Стефановски, цените се пристапни за граѓаните, а возилата се безбедни и прилагодени за сите потреби на патниците.
Граѓаните ќе имаат можност да изберат меѓу единични и повратни, како и месечни и годишни билети по разумни цени. Повратните билети ќе се издаваат во автобусите. На располагање имаме седум возила со различен капацитет на патници, од кои шест се сосем нови“, додава Стефановски.
Дека станува збор за пристапни цени и проект во полза на граѓаните потврдува и анкетата на терен. Граѓаните сметаат дека градовите треба да имаат градски превоз.
Директорот Стефановски потенцираше дека сите возачи се со долгогодишно, професионално искуство и со сите потребни лиценци за работа.
„Петнаесет години имам возачко искуство, европско искуство. И јас и моите колеги, сите сме со долгогодишно искуство и мислам дека ќе бидеме безбедни возачи на патниците“, вели Миле Јорданов.
Aвтобусите ќе се движат на неколку локации во проградските населби, како и меѓуопштински до Општина Карбинци. На располагање се седум возила со капацитет од 29 до 107 патници.
Ребека Спасова М-Нет