Фудбалскиот клуб Работнички продолжува со кадровско засилување во пресрет на продолжението од сезоната, откако потпиша договор со младиот напаѓач Џејсон Езеб кој има шведско државјанство.
Станува збор за 19-годишен офанзивец кој во таборот на „романтичарите“ пристигнува од холандскиот клуб Дордрехт, а зад себе има и солидна младинска фудбалска школа. Езеб својата фудбалска едукација ја минал во академиите на шведски Хамарби и холандскиот гигант Феенорд, што говори за неговиот потенцијал и развој во силни европски средини.
Младиот напаѓач игра на позицијата центарфор и се очекува да внесе свежина и дополнителна конкуренција во офанзивната линија на Работнички во пролетниот дел од шампионатот.
Од клубот му посакаа добредојде и успешни настапи во црвено-белиот дрес, со надеж дека Езеб ќе успее да го потврди својот потенцијал и да придонесе за резултатите на скопскиот прволигаш.