Со рекорден број на пријавени учесници вчера во Штип се одржа второто издание на трката Супериор Ранс. На второто издание пријавени беа 1.415 учесници, од кои имаше и меѓународни тркачи односно од Чешка, Хрватска, Грција и Србија.
Трката се одвиваше околу коритото на реката Отиња, до штипско Ново Село, покрај споменикот „Кирил и Методиј“, покрај општината, паркот „Пролече“ до стартната точка.
Најдобрите тркачи од Македонија беа собрани на едно место, а на трката од 10 километри сосема очекувано на првото место беше Дарио Ивановски, нашиот најдобар атлетичар.
Ивановски даде изјава за телевизија М Нет каде вели дека ималo двојно повеќе публика од минатата година, а тоа многу му се допаднало и додаде дека уживал додека трчал низ Штип.
Младиот штипјанец Александар Арсов го освои второто место на трката на пет километри, а за М Нет вели дека трката била одлична, додава дека патеката во Штип била една од најтешките во Македонија и откри што следно ќе има на негов план.
Билјана Ристиќ на трката на пет километри го освои првото место, а во изјавата за телевизија М Нет вели дека првпат е во Штип и првпат ја трчи оваа трка, Ристиќ додава дека е задоволна од самиот резултат и вели дека патеката е одлична.
Ова беше второто издание на трката во Штип, а на која учество зедоа над 1400 учесници од Македонија и странство.
Александар Ванев, М-Нет