Месец мај е новата шанса за отворање на кино во Штип. Откако не успеа истото да почне да функционира во месец март, па и април, како што беше најавено, според градоначалникот Јорданов месец мај дефинитивно е месец во кој киното ќе се отвори. Вели се чекало 20 години, па пролонгирањата од два месеца ќе се исплатат за штипјани да може уживаат во кино салата. Додава дека завршните подготовки се во тек.
„Во завршна фаза се подготовките, веќе внатрешниот дел е уреден, поставена е целата внатрешна опрема. Во наредните денови очекувам да се зврши и надворешниот дел затоа што со операторот кој ќе работи со кино салата и тие веќе влегуваат во завршна фаза. Дефинитивно месец мај ќе биде месец во кој ќе се завршат овие подготвителни активности. Имаше проблем во издавањето на дозволата за реконструкција, преадаптација на салата, но дефинитивно ако 20 години сме чекале за кино сала, овој месец два кој се пролонгира, не е проблем и Штип ќе добие кино сала.“ – вели Јорданов.
Надлежноста за киното е на операторот, со кој Општината има склучено договор. Јорданов вели дека од нива страна е само поддршката и обезбедениот простор во Мултимедијалниот центар „Киро Глигоров“.
„Според договорот операторот е задолжен за управување со просторот и за управување со самото кино, така е дефинирано во договорот.“ – додаде Јорданов.
Кино сала во Штип нема веќе две децении, а штипјани за да гледаат филм мора да одат во соседните градови.
Лаура Стојанова М-Нет