Денес млади музички таленти ќе настапат во Скопје, концерт на студенти од Музичката академија при УГД Музичка младина на Македонија, во соработка со Музичката академија при Универзитетот „Гоце Делчев“ – Штип, денеска со почеток во 19:00 часот во Музејот на македонската борба во Скопје организира концерт на студенти од академијата. Настанот е дел од програмата „Млад музички албум“, поддржана од Министерството за култура и туризам, преку која континуирано се отвора простор за промоција, јавен настап и професионален развој на младите музички уметници од државата. Публиката ќе има можност да проследи изведби на инструменталисти и соло пејачи, кои ќе интерпретираат дела од Сен-Санс, Шуберт, Менделсон, Рахмањинов, Доницети и други светски композитори. Во програмата учествуваат студенти од класите на повеќе професори и музички педагози од академијата. Концертот е дел од пошироката концертна сезона на Музичка младина на Македонија, која во текот на годината реализира бројни концерти и активности за млади музичари од основното, средното и високото музичко образование. Организаторите информираат дека влезот е слободен за љубетилите да присуствуваат и да ги слушнат младите таленти.
Дајана Сандева, М-Нет