Екипата на Новаци забележа голема победа во рамки на 10. коло од Втората македонска фудбалска лига, откако на домашен терен со 1:0 го доби дуелот со Каменица Саса.
За „рударите“ овој пораз беше голем иако резултатски не изгледа така бидејќи Саса сега е на дното од второлигашката табела со 6 бодови и ја очекува тешка борба за излез од опасната зона, но и борба воопшто за опстанок.
Стрелец на единствениот победник гол за Новаци беше Стефан Јовановски кој погоди во судиското надополнување на првото полувреме.
Новаци предводен од Дарко Крстевски е на 9. место на табелата со 13 бодови и има одлични резултати како повратник во Втората лига. За Саса денешниот пораз беше шести и се наоѓа на последното место на табелата.
Тетекс на домашен терен со 2:0 го доби дуелот со ланскиот прволигаш Скопје во меч кој беше важен и за двете екипи. „Штофарите“ го забележаа петтиот сезонски триумф и сега се на делба на 5. место со екипата на Башкими со по 17 бодови и имаат само три бода негатива во однос на третото место кое води во баражот за Прва лига и четири бода од второто место кое води директно во Прва лига.
Рихан Зеќири уште во 4. минута го отвори резултат за водство на Тетекс од 1:0 на полувреме. На стартот од вториот дел Кристијан Чурлинов постигна гол за водство од 2:0.
Во 65. минута капитенот Трајче Стојковски заработи втор жолт картон и беше исклучен од игра со што Тетекс до крајот играше со играч помалку, а „пиратите“ од Автокоманда не го искористија тој момент и дома се вратија поразени.