Фудбалскиот клуб Вардар е во потрага по нови засилувања, а најновото име кое пристигна на проба во редовите на „црвено-црните“ е аргентинскиот фудбалер Лукас Пулеио.
Станува збор за 27-годишен крилен играч кој во наредниот период ќе се обиде да го убеди стручниот штаб на Вардар дека заслужува договор и место во тимот за продолжението на сезоната.
Пулеио има богато интернационално искуство, а неговиот пат кон Вардар е сличен на оној на Кастањеда, со оглед на тоа што двајцата се дел од истата менаџерска агенција. Минатата сезона настапуваше за црногорскиот Дечиќ, со кој го освои Купот на Црна Гора, а во првенството сезоната ја заврши со шест асистенции, покажувајќи завидна креативност и продорност по крилните позиции.
Дополнително, Пулеио има и европско искуство, каде што во квалификациите за европските купови успеа да постигне и погодок против финскиот шампион ХЈК, што е уште еден доказ за неговиот потенцијал на меѓународната сцена.
Неговиот последен клуб е индонезискиот Арема, каде што настапуваше до неодамна и веќе има постигнато гол во текот на овој месец, што укажува дека се наоѓа во натпреварувачки ритам.
Останува да се види дали аргентинскиот офанзивец ќе ги исполни очекувањата на тренерскиот тим и ќе потпише договор со Вардар, но неговото пристигнување јасно покажува дека клубот сериозно работи на зајакнување на ростерот пред продолжението на сезоната.