Третолигашот ФК БВК Коњаре продолжува со активностите на трансфер пазарот и го претстави своето четврто засилување во пресрет на продолжението од сезоната. Нов член на сино-белите е офанзивниот фудбалер Бејтула Авдулаи, од кого во клубот очекуваат значаен придонес во нападот.
Авдулаи е играч кој се одликува со одличен дриблинг, брзина и изразено чувство за гол, квалитети кои треба да донесат поголема креативност и конкретност во последната третина од теренот. Неговиот стил на игра најавува поголема офанзивна разновидност и дополнителна опасност за противничките одбрани.
Од редовите на БВК Коњаре истакнуваат дека ова засилување е дел од јасната стратегија за зацврстување на тимот и подигнување на квалитетот на играта, со цел остварување на зацртаните амбиции за бараж за Втора лига.
„Добредојде во ФК БВК Коњаре“, порачаа од клубот, со уверување дека Бејтула Авдулаи брзо ќе се вклопи во тимот и ќе стане важен дел од сино-белата приказна.