Делегација на Собранието во Парламентарното собрание на ОБСЕ (ПС на ОБСЕ) во состав: Моника Зајкова, шеф на Делегацијата и потпретседател на ПС на ОБСЕ, како и Бобан Карапејовски, заменик-член на Делегацијата, учествуваа во Мисијата на ПС на ОБСЕ за набљудување на предвремените парламенарни избори во Казахстан, што се одржаа на 23 август 2026 година.
Овие избори следат по уставниот референдум во Казахстан со кој се воведе единствена изборна единица на национално ниво, примена на пропорционален изборен систем со затворени листи и низа други промени.
Потпретседателот на ПС на ОБСЕ, Габор Хајду (Романија), ја извршуваше функцијата специјален координатор на ОБСЕ и шеф на краткорочните набљудувачи на изборите, додека Луција Тацер Перлин (Словенија) беше шеф на делегацијата на ПС на ОБСЕ.
Мисијата на ПС на ОБСЕ се состои од парламентарци од земјите учеснички во ОБСЕ, кои се распоредени за набљудување на парламентарните избори во главниот град Астана, како и во другите региони на Казахстан. Набљудувачите на ПС на ОБСЕ тесно соработуваа со колегите од Канцеларијата за демократски институции и човекови права на ОБСЕ (ОБСЕ/ОДИХР) со цел да добијат повеќе информации за спроведување на парламентарни избори во земјата.
Пред денот на изборите, набљудувачите добија детални брифинзи од претставници на Централната изборна комисија, политичките партии, граѓанското општество, медиумите и независните експерти. По дводневни длабински дискусии, парламентарците од ОБСЕ ќе се распоредат низ Казахстан за да го оценат изборниот процес.
Тимот на Делегацијата на Собранието на Република Северна Македонија ги набљудуваше изборите во различни делови на главниот град Астана и околината, при што посетија околу 12 изборни места и поднесоа писмени извештаи за своите согледувања.
Изборите ќе се оценуваат според демократските заложби содржани во Копенхашкиот документ на ОБСЕ од 1990 година. Нивните наоди ќе бидат сумирани и анализирани со цел да се вклучат во прелиминарните заклучоци на меѓународната мисија за набљудување на изборите, кои ќе бидат претставени на заедничка прес-конференција на 24 август.
Текстот Собраниска делегација во набљудувачка мисија на изборите во Казахстан е превземен од МАКФАКС.