Ракометот во источниот дел од Македонија се шири, со тоа што веќе во неколку гради има активирање на ракометни клубови, тоа што го анализиравме во спортскиот магазин Трибина на М Нет телевизија пред неколку месеци пополека дава резултат со формирање на нови ракометни клубови или реактивирање на клубови кои повторно ќе се натпреваруваат.
Првата ракометна лига ќе брои 14 екипи, а како што претходно информиравме дебитат ќе биде тимот на РК Саса Сокол од Македонска Каменица. По низата успешни спортски приказни од малото рударско гратче сега и ракометот е застапен во овој град со што се отвара можност за младите да бираат и да се насочат кон ракометот.
Исто така РК Делчево се реактивира и по пауза од една година ќе биде дел од Пионерската женска лига на Ракометната федерација на Македонија, клубот ќе се натпреварува во две категории, девојки родени 2012 и помлади и девојки родени 2014 и помлади.
На Истокот актуелни ракометни клубови има во Штип – РК Астибо во женска конкуренција и РК Текстилец во машка конкуренција, исто така и во Свети Николе ГРК Овче Поле и ЖРК Овче Поле СУ. Во Радовиш постојат два клубови РК Радовиш и новоформираниот РК Феникс кој ќе работи и во општина Конче, со што за првпат и оваа рурална општина ќе има ракомет.
Во Кочани ракомет нема, како и во Виница, Берово, Пехчево, Пробиштип и Кратово, а ракомет од оваа година ќе има во Македонска Каменица, а овој спорт се врати и во Делчево.
Александар Ванев, М-Нет