Штипската Клиничка болница доби десет нови медицински кревети кои се донација од француска асоцијација. Медицинскиот персонал денеска ги прими креветите, кои беа доставени и наскоро ќе бидат поставени за користење од страна на пациентите од регионов кои се лекуваат во Клиничката болница во Штип. Станува збор за донација од поголем размер, од која дел е наменет за Штип, а останатиот за Скопје.
„Ова е проект кој се води под покровителство на Министерството за здравство, добиени се поголем број на електрични медицински кревети, коишто ќе бидат распоредени во здравствените установи во Скопје, а ние успеавме еден дел од таа донација да донесеме во Клиничка болница – Штип. Оваа донација заедно со веќенајавените душеци, коишто во наредните ден – два ќе стигнат во Клиничка болница Штип, ќе ги обновиме речиси сите душеци и на малку повисоко ниво ќе ги подигнеме здравствените услови на пациентите“, вели директорот, д-р Ален Георгијев.
Ова е четврти пат оваа асоцијација да донира медицинска опрема за македонските пациенти, а прва за штипската Клиничка болница. Денеска присутен беше и претседателот на Асоцијацијата, кој напомена дека волја имаат, но дали понатаму ќе следат уште донации зависи од ресурсите и финансиите.
„Ние донесовме десет електрични медицински кревети за Болницата, што е дел од поголема донација за Министерството за здравство. Повеќето работи се во Скопје за болниците таму, а овде во Штип донесовме десет кревета“, вели Жак Шлеф, претседател на Асоцијацијата „АЛМА“.
Асоцијацијата во Македонија е присутна петнаесетина години, а досега има помагано и во образованието со донација на образовни установи, а организирани се и културни настани. Ова е нивна прва донација во Штип.
Ребека Спасова М-Нет