Пелистер ја продолжува трансфер-офанзивата и во своите редови го донесе Томче Гроздановски, фудбалер кој по неколку сезони минати надвор од земјава повторно ќе настапува во Првата македонска фудбалска лига.
Играчот за врска, кој има 25 години и е поранешен сениорски репрезентативец на Македонија, доаѓа од романската Конкордиа и со битолскиот клуб договори соработка до крајот на тековната сезона. Неговото доаѓање треба да донесе поголема сигурност и креативност во средниот ред на „зелено-белите“.
Фудбалскиот пат Гроздановски го започна во Металург, по што играше за Кожуф, а интернационалната кариера ја продолжи во Словачка како член на Злате Моравче. Подоцна беше дел и од хрватскиот Дугопоље, пред повторно да се врати во македонскиот шампионат каде настапуваше за Работнички и Силекс.
Со ова засилување, Пелистер добива играч со богато искуство и континуитет, кој може да има важна улога во пролетниот дел од сезоната.