Вардар не успеа да обезбеди позитивен резултат на првиот натпревар од второто квалификациско коло во Конференциската лига, откако вечерва на арената „Тодор Проески“ беше поразен од летонскиот претставник Рига со 2:3. И покрај поразот, „црвено-црните“ покажаа карактер и до самиот крај останаа во игра за поволен исход.
Македонскиот претставник одлично го отвори натпреварот и прв стигна до водство. Во 28. минута Диего Кастањеда ја затресе мрежата на гостите за голема радост на домашната публика. Сепак, радоста траеше кратко, бидејќи Рига брзо одговори. Најнапред Орландо Гало израмни во 35. минута, а само четири минути подоцна Иаго Сикеира донесе пресврт и водство од 1:2 за летонскиот состав.
Во второто полувреме Вардар не се предаде. Избраниците на домашниот стратег создадоа неколку опасни ситуации, а наградата пристигна во 66. минута кога искусниот Жерсон Родригеш погоди за 2:2 и повторно ја разгоре надежта дека Вардар може да стигне до позитивен резултат. Но, во финишот на средбата, во 81. минута, Иаго Сикеира уште еднаш беше прецизен и со својот втор погодок ја обезбеди победата на Рига од 2:3.
Иако Вардар остана без реми на домашен терен, впечатокот е дека двомечот сè уште не е решен. Македонскиот претставник покажа дека може да се носи со ривалот, а реваншот во Рига ќе биде нова можност да се надополни негативата и да се продолжи европската приказна.