Младиот фудбалер Али Голиќ и официјално се прости од ОФК Малеш од Берово, клубот во кој ги направи своите најважни фудбалски чекори, а кариерата ќе ја продолжи во редовите на Брера Струмица.
Преку емотивна порака, Голиќ им се заблагодари на сите што биле дел од неговиот развој, истакнувајќи дека годините поминати во Малеш ќе останат незаборавен дел од неговиот живот.
Посебна благодарност упати до Игор Дамјански, Новица Пецински, Методи Даскаловски и Александар Мишовски за довербата, поддршката и советите што ги добивал во текот на престојот во клубот.
Тој не ги заборави ниту своите соиграчи од помладите категории и сениорскиот тим, со кои, како што вели, споделил бројни победи, предизвици и моменти што засекогаш ќе останат во неговото сеќавање.
„ОФК Малеш ќе остане важен дел од мојот живот и мојот фудбалски пат. Горд сум што го носев дресот на најстариот клуб во Македонија и секогаш ќе навивам за неговите успеси. Сега пред мене е нов предизвик во Брера, каде ќе продолжам напорно да работам и да се развивам“, порача Голиќ.
Со овој трансфер, талентираниот фудбалер започнува ново поглавје во својата кариера, а Брера Струмица добива уште едно младо и амбициозно засилување во своите редови. Очекувањата се дека Голиќ ќе продолжи со својот развој и ќе се избори за значајна улога во струмичката екипа.