Македонија има светски шампион! Штипјанецот Марко Џорлев се искачи на врвот на светското карате, откако триумфираше во финалето на Светското првенство за кадети, јуниори и натпреварувачи до 21 година во Бјелско-Бјала, Полска, освојувајќи го златниот медал во категоријата до 63 килограми.
По извонредните настапи во текот на целиот шампионат, македонскиот репрезентативец го круниса својот настап со највредното одличје и испиша нова златна страница во македонското карате.
Џорлев до финалето стигна со четири победи од четири борби, демонстрирајќи квалитет, сигурност и шампионски карактер. На стартот го совлада Алехандро Перез од Куба со 10:6, потоа беше подобар од Хозе Андрес Гарсија од Гвајана со 6:1, а во третата борба славеше убедливо со 6:0 против Леонс Акоповс од Латвија.
Вистинската демонстрација на сила следуваше во полуфиналето, каде што Штипјанецот со убедливи 8:0 го совлада Јан Мата од Панама и обезбеди пласман во големото финале.
Таму го чекаше Адам Баги од Унгарија, но Џорлев го направи и последниот чекор до светскиот врв, победувајќи го со 4:1 во финалната пресметка и освојувајќи го златниот медал.
Пет борби, пет победи и злато за Македонија! Марко Џорлев покажа дека е меѓу најдобрите млади каратисти во светот, а неговиот успех е огромна гордост за Штип и за македонскиот спорт.
Од Штип до светскиот врв – Марко Џорлев е светски шампион!