Oд ноќеска на полноќ поевтинува Дизел горивото за 4 денари по литар, додека цената на бензинот ЕУРОСУПЕР БС-98 се намалува за 0,5 денари по литар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со најновата одлука, малопродажните цени на нафтените деривати во просек се намалуваат за 1,78 проценти.
Според новиот ценовник, ЕУРОДИЗЕЛ БС (Д-Е V) ќе се продава по цена од 89,5 денари за литар, додека ЕУРОСУПЕР БС-98 ќе чини 86,5 денари за литар. Цената на ЕУРОСУПЕР БС-95 останува непроменета и ќе изнесува 85 денари за литар.
РКЕ донесе одлука и за намалување на цената на Екстра лесното масло за домаќинство (ЕЛ-1) за 4,5 денари, па новата цена ќе биде 94 денари за литар. Од друга страна, цената на Мазутот М-1 НС бележи мало зголемување од 0,248 денари и ќе изнесува 49,968 денари за килограм.
Од Регулаторната комисија информираат дека падот на цените е резултат на движењата на светските пазари. Во споредба со претходната пресметка, референтните цени на бензините се намалени во просек за 0,444 проценти, дизелот за 6,073 проценти, а екстра лесното масло за 6,495 проценти. Кај мазутот, пак, е регистрирано зголемување од 0,791 проценти. Дополнително, курсот на денарот во однос на американскиот долар е понизок за 0,1199 проценти.
Од РКЕ потсетуваат дека утврдените цени се максимални, а трговците на големо и мало имаат можност горивата да ги продаваат и по пониски цени. Во најголем дел од бензинските пумпи низ државата, дизелот моментално се продава за околу три денари пониско од максимално утврдената цена, додека бензините се поевтини за околу два денари
Дајана Сандева, М-Нет