Фудбалските екипи на Осогово и Вардар одиграа пријателски хуманитарен натпревар во Кочани, настан организиран во знак на почит кон жртвите од неодамнешната трагедија и како поддршка за семејствата и граѓаните.
Натпреварот заврши со победа на Вардар од 4:1, но резултатот беше во втор план, бидејќи примарната цел на средбата беше хуманитарниот карактер и пораката за заедништво и солидарност.
Во рамки на настанот, на лицитација беше ставен дресот на Стојанче Велинов, со кој фудбалерот го освои Купот на Македонија. Собраните средства од лицитацијата се наменети за хуманитарни цели.
Дресот на крајот беше откупен од навивачката група на Вардар, „Комити“, кои потоа го подарија на млад навивач на Осогово, гест што беше поздравен од присутните и дополнително ја нагласи пораката за хуманост и меѓусебна поддршка.
Хуманитарниот натпревар уште еднаш покажа дека фудбалот може да обедини и да испрати силна порака во моменти кога поддршката и човечноста се најпотребни.