Оваа сабота нема да се одржи Маршот за Ангелите во Кочани, поради празникот Илинден, информираа семејствата на настраданите преку писмено соопштение до јавноста.
,,Во име на сите мајки, татковци и семејства кои ги загубија своите најмили во трагедијата во Кабарето „Пулс“ на 16 март, сакаме да ве известиме дека оваа сабота, 2 август 2025, нема да го одржиме редовниот „Марш за ангелите“.
Причината е државниот празник 2 Август – Илинден, ден кој го слави духот на борбата за слобода и достоинство. Веруваме дека овој ден заслужува тишина и почит, но и потсетување дека вистинската слобода доаѓа само кога има правда за невините, кога гласот на жртвите не е замолчен, туку чуен.
Иако овој викенд нема да бидеме на улиците, нашата болка, љубов и борба не престануваат. Продолжуваме следната сабота – посветени, обединети и гласни – во име на сите што беа неправедно одземени.
Ви благодариме за вашата поддршка и разбирање.
Да бидеме достоинствени како нивната љубов и силни како нивниот спомен.” – стои во соопштението на родителите на трагично загинатите деца во дискотека Пулс во Кочани.