Четврти пат по ред, на планината Плачковица, ќе се одржи најголемата планинска трка за деца, која не само што ќе ги тестира физичките способности на најмладите, туку и ќе ги поттикне да го сакаат спортот, природата и здравиот живот. Овој настан, кој комбинира спорт, забава и едукација, ќе ги собере најмладите натпреварувачи, кои ќе трчаат на 200, 400 и 600 метри во различни категории според возраст. За најмладите – трка на 200 метри, Средни категории – трка на 400 метри, а за најголемите (до 13 години) – најголема дистанца – 600 метри. Трката не е само натпреварување, туку и ден полн со возбуда и емоции! Сите деца, без разлика на пол, ќе се натпреваруваат во машка и женска категорија. Плакети, дипломи, медали и подароци чекаат на победниците во секоја категорија, а ќе бидат наградени и највредните учесници во неофицијалниот дел од настанот – натпревар помеѓу родителите и децата. Настант утре ќе биде пропратен и со музика од страна на ДЈ Баз, кој гарантира добра забава. Предвидено е да има и штандови со вегетеријанска храна, со цел да се подигне свеста и љубовта на сите кон здравата исхрана. Иницијатор и организатор на настанот е Биљана Донева, лиценциран планинарски водич и голем љубител на природата и спортот. Со цел да го поттикне здравиот начин на живот и да ги инспирира најмладите да ја обожаваат природата, Биљана ја создаде оваа трка како место за забава и учење.
Целта на настанот е јасна: да ги поврзе децата со природата, да го промовира планинарењето, здравиот начин на живот и едукацијата во најмладата возраст.
Иван Митев, М-Нет