Дали локалната власт ги троши парите на граѓаните на вистинските приоритети? Како може тоа да има за камења на Исарот, а да нема за лековитоста и моќта на водата во бања Кежовица? – прашаа денеска на прес конференција од ОО на СДСМ Штип.
„ Општина Штип планира да потроши 100 милиони денари за реконструкција на ѕидините на Исарот. Додека истовремено, Бања Кежовица – една од најлековитите термоминерални води во Македонија – е во крајно запуштена состојба. Кабините се руинирани, базените не се одржуваат, а овој природен благодет на градот пропаѓа пред нашите очи. Штип заслужува повеќе. Наместо да се вложува во камења и ѕидови, локалната власт мора да инвестира во уредување на Кежовица и создавање на модерен бањски центар. Со тоа, општината не само што ќе го подобри здравјето и квалитетот на живот на граѓаните, туку и ќе генерира профит преку развој на бањскиот туризам. Го повикуваме градоначалникот и општинските власти да ја преиспитаат оваа одлука и да ги пренасочат средствата кон проекти што ќе донесат реална корист за граѓаните. Време е да размислуваме за иднината и за одржлив развој, а не само за еднократни реконструкции без долгорочна визија.“ – вели Иванов.
Од СДСМ Штип посочија дека градот заслужува достоинствен бањски центар.
Лаура Стојанова Ќирчов, М-Нет