Кошаркарската федерација на Република Македонија и официјално го назначи шпанскиот стручњак Хозе Мариа Берокал за нов селектор на машката сениорска репрезентација. Одлуката беше донесена на седница на Управниот одбор на Федерацијата, со што започнува ново поглавје во развојот на националниот тим.
Берокал зад себе има импресивна тренерска кариера долга повеќе од 35 години, од кои 21 година во професионалната кошарка, како и 14 сезони во Евролигата – најсилното европско клупско натпреварување. Во текот на својата кариера има освоено вкупно 21 трофеј, меѓу кои и две титули во Евролигата, што го вбројува меѓу најтрофејните интернационални тренери на Стариот континент.
Шпанецот работел во врвни европски клубови како Барселона, Панатинаикос, Басконија, Макаби Тел Авив и Баерн Минхен, а своето знаење го надградувал во 13 различни национални лиги и девет држави, вклучително и во шпанската АЦБ лига, турската, израелската и украинската елита.
Во текот на кариерата соработувал со големи тренерски имиња како Светислав Пешиќ, Чави Пасквал, Душко Ивановиќ, Јоргос Барцокас, Велимир Перасовиќ, Одед Каташ и Гордон Херберт, што дополнително ја нагласува неговата професионална тежина и авторитет.
Покрај сениорската кошарка, Берокал има и сериозно искуство во работа со млади категории, со 15 години ангажман во младински селекции и две шампионски титули во Шпанија со У18 репрезентации. Неговиот пристап е препознаен како системски и дисциплиниран, со силен фокус на долгорочен развој на играчи и тимска структура.
Назначувањето на Берокал е дел од пошироката стратегија на КФМ за подигнување на стручните стандарди и воспоставување модерен систем на работа, со цел создавање конкурентна сениорска репрезентација поврзана со младинските селекции.
Од Федерацијата изразуваат уверување дека искуството и меѓународниот углед на новиот селектор ќе донесат стабилност, напредок и јасна визија за иднината на македонската кошарка.