Голем шумски пожар избувна во атарот на светиниколското село Богословец, каде огнената стихија зафати поширока површина со шумска вегетација. Поради сериозноста на ситуацијата, во акцијата за локализирање и гаснење на пожарот се вклучени бројни противпожарни екипи од повеќе градови во државата.
На терен интервенираат пожарникари од неколку територијални противпожарни единици, меѓу кои и екипи од Штип, кои заедно со останатите служби вложуваат максимални напори за ставање на пожарот под контрола и спречување на негово понатамошно ширење.
Поради непристапниот терен и обемот на пожарот, активирано е и гаснење од воздух. Во акцијата учествуваат ер тракторите на Дирекцијата за заштита и спасување, кои од воздух фрлаат вода врз најкритичните делови од опожареното подрачје.
Надлежните служби будно ја следат состојбата, а координираната акција на копнените и воздушните сили има за цел што побрзо локализирање на пожарот и заштита на шумскиот фонд и околното население.
