Крушите, сливите и грозјето полека, но сигурно ги заменуваат доматите и пиперките на трпезите. На штипскиот пазар, последниот септемвриски петок, веќе може да се забележи дека интересот на купувачите се менува. Иако сè уште има купувачи кои се заинтересирани за домати и пиперки, кои најчесто ги купуваат за подготовка на зимница и пинџур, сепак очигледно е дека интересот за нив допрва ќе се намалува.
Кога станува збор за цените, мислењата на купувачите се различни. Додека едни велат дека има и поевтини производи, други се жалат дека цените се високи и дека сè зависи од висината на платата или пензијата. За пензионерите и граѓаните со пониски примања, секое поскапување значи и помалку производи во торбата.
Производителите се децидни дека продаваат квалитетни и здрави производи, со проверено потекло и свежина.
И купувачите и производителите се соочуваат со истата мака – да се најде прифатлива цена. Купувачите гледаат да поминат поевтино, но велат дека ја разбираат и маката на производителите, кои имаат сè повисоки трошоци за производство.
Ева Тушевска, М-Нет