Второлигашот Брегалница од Штип ги заврши настапите во Купот на Македонија, откако „сините“ загубија во пенал-рулетот од прволигашот Работнички. Регуларниот дел заврши со по еден гол за 1:1, откако најпрво тимот од Дебар Маало го отвори резултатот преку Џељиљ Асани, а пак на стартот од вториот дел Еди Мандак ги постави конечни 1:1.
Во пенал серијата екипата на Работнички беше подобра и со тоа патува во четвртфиналето од Купот на Македонија.
Со голот на Арсим Љамалари второлигашот Шкендија Арачиново обезбеди четвртфинале исфрлајќи го прволигашот Пелистер со минимални 1:0. Тимот од Арачиново ја продолжува одличната серија резултати.
Струга Трим Лум го декласираше тимот на Македонија ЃП откако мечот го доби со убедливи 0:5, а пак екипата на Силекс славеше во Куманово со 1:2 над Башкими.
Со тоа во четвртфиналето се Работнички, Силекс, Струга Трим Лум и Шкендија Арачиново, а претходно во четвртфиналето се пласираа второлигашите Охрид и Детонит Плачковица од Радовиш.
Александар Ванев, М-Нет