Над 29.000 граѓани на ниво на државата и нешто повеќе од 1600 во штипскиот Центар за јавно здравје се вакцинирале против сезонски грип. Бесплатната вакцина важи за ризични грипи, за кои во Штип се обезбедени 2.800 вакцини и уште 100 се комерцијални вакцини. Д-р Светлана Живкова, специјалист епидемиолог во Центарот за јавно здравје, вели дека на дневно ниво се вакцинираат од 120 до 160 граѓани.
„Имунизацијата против сезонскиот грип се одвива секојдневно во Центарот за јавно здравје, во Здравствениот дом во Штип. Интересот на граѓаните е задоволителен, вакцината е наменета за возрасни лица над 65 години, за лица со хронични заболувања, здравствени работници, бремени жени и деца на возраст од шест месеци до пет години. Досега се имунизирани околу 1650 лица, а интересот е најголем кај повозрасната популација односно кај лицата над 65 години и лицата со хронично заболување“, вели д-р Светлана Живкова, специјалист епидемиолог во ЈЗУ Центар за јавно здравје – Штип.
Според информациите на Министерството за здравство, за бесплатната вакцина против сезонски грип досега се пријавени 58.012 граѓани. Во центрите за јавно здравје и здравствените домови континуирано се врши имунизација против сезонски грип и досега се вакцинирани над 29.000 граѓани. Зголемена е и количината на купени вакцини, односно на располагање се 60.000 дози четиритипни вакцини наменети за бесплатна вакцинација.
„Заинтересираните може да се пријават за бесплатна вакцинација со пополнување на апликацијата на веб-страницата vakcinacija.mk, а потоа преку СМС-порака ќе добијат повратна информација за датум, час и место за вакцинација. Вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход, особено кај ризичните групи.“ – информираат од Министерството.
Вакцинацијата против сезонскиот грип започна на 25. минатиот месец, а уште на самиот почеток интерес имаа пројавено околу 30.000 граѓани.
Ребека Спасова М-Нет