КК МЗТ Аеродром Скопје продолжува да ја гради својата богата трофејна историја. „Плаво-белите“ го освоија Суперкупот на Македонија по деветти пат, откако во возбудлив натпревар славеа со 70-68 против Куманово, и тоа на теренот на противникот.
Триумфот доаѓа на самиот почеток на новата сезона и претставува силна најава за амбициите на скопскиот клуб, кој во новата сезона ќе се натпреварува на три фронта.
Во победата над Куманово, лидер на МЗТ беше Ноа Фарахан со 20 поени, додека Војдан Стојановски запиша 16 поени и седум скока. Лука Стојановски придонесе со 11 поени.
Со деветтиот Суперкуп, МЗТ Скопје ја зголеми својата импресивна колекција на трофеи на вкупно 36 – девет Суперкупа, 13 шампионски титули и 14 Купа на Македонија.
Од клубот велат дека освоениот трофеј е одличен мотив и подигнување на моралот пред продолжението на сезоната, а поддршката од навивачите ја гледаат како еден од клучните фактори во новите предизвици.
Интересно е што Куманово повторно ќе биде противник на МЗТ во следниот период. Двата тима ќе се сретнат уште еднаш, овојпат во воведното коло од Суперлигата, на 2 октомври во Скопје.
Аеродром слави деветти Суперкуп, а „плаво-белите“ веќе ја најавуваат битката за нови трофеи.