Полни 50 години Друштвото за планинарски спортови „Лисец“ од Штип битисува на овие простори постојано проширувајќи го видикот кон бескрајните европски па и светски височини и полнејќи ги витрините со вредни успеси, признанија и трофеи. Во архивата на ДПС „Лисец“ се врежани имињата на скоро половина штипјани кои во текот на изминатите 50 години испишувале и сеуште испишуваат планинарски и алпинстички, случки, херојски подвизи и катадневни дружби со планинските превои и врвови во нивното искачување и „бодење“ на националното обележје, знамето на Република Македонија како знак на успешна заедничка трка на човекот и планината. Овде нема освојување или борба со планината, овде во планината вирее царството на другарството и меѓусебното пријателство и почитување во постојаното докажување на умешноста, мајсторството и спремноста помеѓу планинарот со „табиетот“ на планината.
Во духот на своите планинарски активности, со почит кон нивните милни планини, бистриот и чист воздух, раководството на ДПС „Лисец“ се одважи на отворено да организира Трибина на тема планинарење со проекција на тематски филм – „Via Dinarica“. Членот на ДПС „Лисец“ Милорад Ангелов ги запозна присутните на трибината со сценариото и текот на трибината на која свои тематски прикази имаа Претседателот на друштвото, Александар Санев, како и инструкторите Јован Иванов и Мане Ангеловски и тука некаде временските услови, односно дождот не дозволи да се доискажат уште неколкуте предвидени презентери со своите драгоцени планински искуства и трибината се прекина. Не беше заборавен ниту подмладокот, најмладите кои уште отсега најавуваат дека тешко ќе се одделат од нивниот втор дом – планината со која веќе на големо скоро секој викенд другаруваат.
Ова е само почеток на еден нов вид запознавање со убавините на планините за што организаторите го заслужуваат сето внимание и почит за ваквиот нов момент на вистина за планините и врвовите ширум Македонија па и пошироко.
Во оваа пригода неизбежно е да се спомене името на Трајче Алексов, алфа и омега на друштвото, кој со години и децении работи и живее во Австралија и кој заедно со неговиот голем другар и пријател Ендрју Лог имаат учествувано на многуте Македонско – Австралиски Хималајски експедиции. Колку за потсетување Ендрју Лог е алпинистот кој ги има искачено сите 14 врвови на Хималаите кои се високи над 8.000 м. а самиот највисок врв Монт Еверест висок 8848м. го има два пати искачено.
Драги Герасимов – Пушка Mnet.mk